Бугун давлатимиз раҳбари Нукусга ташрифи давомида шаҳардаги «Қорақалпоқ балиқ саноат» МЧЖ фаолияти билан танишди. Бу ҳақда президент матбуот хизмати хабар қилди.
Маълум бўлишича, ушбу корхона шу йил июл ойида ишга туширилган. У ерда 35 нафар фуқаро иш билан банд. Корхона йилига 200 тонна балиқ, 5 миллион дона балиқ личинкалари етиштириш, 5 минг тонна озуқа ем тайёрлаш салоҳиятига эга. Яна бир муҳим жиҳати, ушбу корхонада сув тежалган ҳолда балиқ етиштирилади. Яъни, сувдан такроран фойдаланиш орқали кўп сув тежаб қолинади. У ерда 200 тонна балиқ етишритир учун одатдагидек 1,5 млн метр куб сув эмас, балки 250 метр куб етарли бўлиши таъкидланди.
Шунингдек, президентнинг мазкур корхонага ташрифи давомида қишлоқ хўжалиги тармоқларидаги лойиҳаларнинг тақдимоти ҳам бўлиб ўтди. Унда президент оилавий кооперцияларни йўлга қўйиб, паррандани кўпайтириб, гўшт нархини арзонлаштириш чораларини кўриш муҳимлигини таъкидлади.
Шу билан бирга, мазкур ҳудудда ер ва сувни аниқ ҳисобга олишда замонавий ахборот технологияларидан фойдаланиш кераклиги айтилди.
