Аввалроқ Инвестициялар ва ташқи савдо вазирлигининг 84 нафар ходимлари меҳмонхонада 22 кун яшагани ва унинг форумлар саройидан фойдалангани учун 918,6 млн сўм тўлангани ҳақида ёзган эдик.
Маълум бўлишича, ходимлар 22 кун эмас, балки умумий ҳисобда 52 кун Интерконтинентал меҳмонхонасида яшаган. Бунга 2 млрд сўмдан зиёдроқ пул сарфланган. Инвестициялар ва ташқи савдо вазирининг биринчи ўринбосари Азиз Воитовнинг маълум қилишича, бу пандемия шароитида ходималарни ўзига хос усулда карантинга олиш ва ишлар тўхтаб қолмаслиги учун қўлланилган бир йўл бўлган. Меҳмонхона вазирликка қарашли бўлгани учун унга ажратилган пул вазирлик атрофида айланган ва бунга бир сўм ҳам бюджетдан пул кетмаган. Шу билан бирга, ходимларни у ерга жойлаштириш орқали ҳамма ишсиз юрган вақтда меҳмонхона ходимлари ҳам иш билан таъминланиб қолгани таъкидланмоқда.
Шунингдек, вазирлик ходимларининг шу йўл билан ишга жалб қилиниши орқали иқтисодий самараси юз миллионлаб эмас, балки триллионлаб сўмни ташкил этадиган лойиҳаларни амалга ошириш имконини бергани алоҳида таъкидланди.
