Андижон вилояти Хонобод шаҳрида хорижий компанияга доимий фойдаланиш учун 10 гектар ер ажратилади. Бу ҳақда Адлия вазирлиги хабар қилди.
Маълум бўлишича, президентнинг шу йил 26 ноябрдаги “Андижон вилояти Хонобод шаҳрида “Life Khonobod” инвестиция ва туристик лойиҳасини амалга ошириш чора-тадбирлари тўғрисида”ги қарорига кўра хорижий “Water life mineral” МЧЖга босқичма босқич равишда 10 гектар ер доимий фойдаланиш учун ажратилади. Ушбу компания биринчи босқчида Хонободда “Life Khonobod” бренди остида маъданли сув ишлаб чиқаради. Шунингдек, компания учун ичимликлар галереяси (бювет), эсдалик буюмлари (сувенер) дўкони ва ўзи ишлаб чиқарган маҳсулотлар намойиш этиладиган шоурумлар ташкил этилади.
Иккинчи босқичда инвесторлар Хонободда замонавий дам олиш масканини қуради.
Президент қарорига кўра ушбу инвесторга 2020-2021 йилларда ҳудудга 14,3 млн евро миқдорида инвестиция киритиш ва камида 200 та янги иш ўрни яратиш мажбурияти ҳамда 2022-2023 йилларда 20 млрд сўмлик инвестиция орқали 150 ўринли дам олиш масканини қуриш ва камида 30 та иш ўрни яратиш кераклиги белгилаб қўйилди.
