Ўзбекистонда сўнгги вақтларда электр энергияси ўчиши ҳолати тез-тездан такрорланмоқда. У билан боғлиқ муаммо асосан қиш мавсумида кўпроқ кузатилмоқда.
Мамлакатимизнинг айрим ҳудудларида электр кунига соатлаб ўчирилмоқда. Кўплаб мурожаатлардан сўнг «Ўзбекистон миллий электр тармоқлари» АЖ вакиллари ушбу мавзуда брифинг ўтказди.
Брифинг давомида электр энергияси бир нечта факторларга кўра узилиб қолиши маълум қилинди. Узилишнинг илк сабаби – электр тармоғига климатнинг таъсири. Масалан, ҳаво ёмон бўлган вақтда дарахт шохларининг проводларга тегиб кетиши ёки шамолнинг кучайиши ва ёмғир натижасида унга шикаст етиши. Шунингдек, мамлакатимизда битта трансформаторга 300-400 хонадон уланган. Аслида, трансформаторлар 200 та хонадонга мўлжалланган бўлади. Бундан ташқари, ишлаб чиқариш ва истеъмолдаги тафовут ҳам тизимнинг яхлитлигига ва унинг барқарор ишлашига таъсир қилади. Режали узилишлар эса аниқ техник сабабларга кўра амалга оширилиши мумкин. Таъкидлаш жоиз, узилиш ҳолатларининг кўпайиши иқтисодиётга ҳам салбий таъсир кўрсатади.
