Денов туман ҳокимлигида ЎзЛиДеП Сурхондарё вилоят Кенгаши депутатлари, тумандаги фермер, тадбиркорлар иштирокида ўтказилган йиғилишда Денов туманини комплекс ривожлантириш дастурига киритилиши лозим бўлган масалалар ўртага ташланди.
Йиғилишда Олий Мажлис Қонунчилик палатаси Спикери ўринбосари, ЎзЛиДеП фракцияси раҳбари Актам Хаитов ҳам иштирок этиб, туманда қишлоқ хўжалигини ривожлантириш, логистика марказларини ташкил этиш, сув йўқ жойларда артезиан қудуқларини ўрнатиш ва бошқа муҳим масалалар хусусида қимматли таклифларни берди.
Мазкур таклифлардан келиб чиқиб, хусусан, туманнинг Собир Раҳимов СИУ ҳудудидан 800 га ер майдонида томчилатиб суғориладиган ёнғоқзор ташкил этиш дастурга киритилди. Шунингдек, сув бормайдиган ҳудудлар Шароф Рашидов ҳамда Амир Темур СИУларида 2 тадан 4 та артезиан қудуғи ўрнатилади.
— Бундан ташқари, туманда бир эмас 2 та логистика маркази ташкил этиш масаласи ҳам кўриб чиқилди, — дейди ЎзЛиДеП вилоят Кенгаши депутати, Ўзбекистон қаҳрамони Ахмад Нарзуллаев. — Улардан бири Амир Темур СИУ ҳудудида 13 гектар ер майдонида қурилиши режалаштирилган. Унда иссиқхона, мева ва сабзавотларни сақловчи музлаткичли омборхона ҳамда боғ ҳам барпо этилади. Энг муҳими, логистика марказида туманимизда етиштирилган сабзавот ва мевалар сараланиб, махсус юк машиналарида тўғридан тўғри хорижга экспорт қилинади.
Учрашувда давлат раҳбари қарори ижросини таъминлаш бўйича бошқа қатор масалалар хусусида ҳам фикр билдирилди.
ЎзЛиДеП Сурхондарё вилоят Кенгаши
матбуот хизмати
матбуот хизмати
