Навоий вилоятида 2021 йилнинг 1 январидан бошлаб ичимлик суви нархи уч бараварга қимматлашади. Бу ҳақда Кун нашри хабар қилди.
Маълум бўлишича, сув нархи ошиши ҳақидаги қарор халқ депутатлари Навоий вилояти кенгашининг навбатдаги сессиясида маъқулланган. Унга кўра энидиликда вилоятда фуқароларга 1 м³ ичимлик суви учун 3 000 сўм (ҳозирги нарх 1 080 сўм), бюджет ташкилотлари ва улгуржи истеъмолчилар учун эса 7 000 сўм (ҳозирги нарх 3 300 сўм) қилиб белгиланган. Сув нархи оширилишининг сабаби ҳам маълум қилинди. Вилоят ҳудудидаги сув иншоотлари ва қувурларнинг эскириб, таъмирталаб аҳволга келиб қолгани сабабли ушбу қарорга келинган.
«Навоий сув таъминоти» МЧЖнинг маълум қилишича, бугунги кунда вилоятдаги сув тарқатиш иншоотининг 28 таси (14 фоизи) ва жами 2 784,8 км ичимлик сув тармоқларининг 17 фоизи таъмирталаб аҳволга келиб қолган. Ушбу иншоотлар оҳирги марта 50 йил олдин ётқизилган. Шунингдек, Самарқанд вилоятида ҳам сув нархи ошиши маълум қилинди. Лекин у ерда ичимлик сувининг 1 м³ Навоийдаги каби 3 000 сўмни эмас, балки 1 850 сўмни ташкил қилади. Бюджет ва улгуржи истеъмолчилар учун эса 3 500 сўм қилиб белгиланган.
