Президент матбуот хизматининг хабар қилишича, айни вақтда Шавкат Мирзиёев раислигида ўтаётган видеоселектор йиғилишида қишга тайёргарликда йўл қўйилган камчиликларни ҳал этиш масалалари танқидий таҳлил қилинмоқда.
“Менга баландпарвоз гаплар ва рақамлар керак эмас. Жойлардаги раҳбарларнинг ишлари натижасига ижтимоий тармоқларда халқимиз ўзи холис баҳо бермоқда”, – деди Шавкат Мирзиёев.
Йиғилишда бугунги кунда ҳудудларни узлуксиз электр энергия билан таъминлаш учун кунига 10-12 миллион киловатт-соат қўшимча электр энергияси ишлаб чиқариш зарурлиги қайд этилди. Ушбу қувватни “Тошкент”, “Сирдарё”, “Янги Ангрен” электр станцияларидаги 900 мегаваттли 5 та энергоблокни ишга тушириш ҳисобидан таъминлаш бўйича топшириқ берилди.
Ҳудудларда узилишларга 60 фоиз трансформаторларнинг эскиргани сабаб қилиб кўрсатилмоқда. Президент ушбу муаммони ҳал қилиш бўйича топшириқ берди.
Йиғилишда электр энергиядаги муаммолар билан бирга газ муаммоси ҳам муҳокама қилинди. Маълум қилинишича, ҳозирда 20 миллион куб метр газ танқислиги бор.
“Газ тизими билан боғлиқ муаммолар бугун юзага келмагани, балки ўттиз йилдан бери бизни қийнаб келаётганидан барчамиз хабардормиз. Лекин буни баҳона қилишга ҳеч кимнинг ҳаққи йўқ. Халқимизга газ керак, уларнинг кўпчилиги бунинг учун тўловларни ўз вақтида ҳалол қилиб, тўлаб келмоқда”, – деди Президент.
Давлатимиз раҳбари йиғилишда ушбу муаммони ҳал қилиш учун газ экспортини қисқаритириб, аввало аҳолига газни етказиб бериш кераклигини таъкидлади. Ушбу иш орқали кунига 7-8 миллион куб метр табиий газ қўшимча равишда ҳудудларга йўналтирилади. Шунингдек, аҳоли эҳтиёжини қоплаш учун яна 217 минг тонна суюлтирилган газ етказиб бериш вазифаси қўйилди.
