Ўзбекистон “Ўзбекистонда шаффоф ва кенг бозор иқтисодиётига ўтишни ривожлантириш сиёсатини қўллаб-қувватлаш” лойиҳасини амалга ошириш учун 500 миллион доллар қарз олади. Бу ҳақда uznews.uz нашри хабар қилди.
Маълум бўлишича, ушбу лойиҳани амалга ошириш учун Жаҳон банки билан шартнома имзоланган. Шартномага кўра, Халқаро тикланиш ва тараққиёт банки Ўзбекистонга 250 миллион АҚШ доллари ажратади. Маблағлар 10,5 йил муддатга 5 йил имтиёзли даври билан берилади. Шунингдек, Халқаро тараққиёт уюшмаси томонидан 30 йилга 165 миллион доллар имтиёзли ва 85 миллион доллар имтиёзсиз қарз маблағлари жалб қилинади. Ушбу олинган қарзлар Ўзбекистон бюджети харажатларини молиялаштиришга йўналтирилади.
Ушбу маблағларнинг сарфланишини назорат қилиш ва мониторинг жараёни Молия вазирлигига топширилди. Олинган қарзларни қайтариш республика бюджети маблағлари ҳисобидан амалга оширилади.
