Ўзбекистонда жорий йилнинг 20 апрель санасида Тошкент шаҳри ва Тошкент вилоятида бир хил кўринишдаги жиноятлар содир этилди.
Шу куни 2 номаълум шахс Тошкент шаҳрининг Учтепа туманида фуқаро Ф.Ж. исмли аёлнинг қўлидан сумкасини тортиб олиб, воқеа жойидан қочиб кетган. Олиб қочилган сумка ичида “Samsung” русумли мобиль телефони, фуқаролик паспорти, дипломи ва 11 турдаги тақинчоқлари бўлган.
Кўрилган чоралар натижасида ушбу жиноятни Жиззах вилояти Дўстлик тумани Бунёдкор ҚФЙда яшовчи У.А. ва муқаддам судланган Ж.Қ.лар содир этганликлари аниқланиб, ушланган.
Яна бир шунга ўхшаш ҳолат Тошкент вилоятининг Чирчиқ шаҳрида содир этилди. Икки номаълум шахс 20 апрелда Тошкент вилоятининг Чирчиқ шаҳрида яшовчи С.А. исмли аёлни қўлидан ичида 150000 сўм пули ва “Samsung” русумли мобиль телефони бўлган сумкасини тортиб олиб, воқеа жойидан яширинганлар.
Кўрилган чоралар натижасида ушбу жиноятни Чирчиқ шаҳар Низомий кўчасида яшовчи И.А. ва Бўстонлиқ тумани Янгиовул ҚФЙда яшовчи Н.Қ.лар содир этганликлари аниқланиб, ушланганлар.
Ҳар иккала ҳолат юзасидан жиноят иши қўзғатилиб, тергов ҳаракатлари олиб борилмоқда.
