Аввалроқ сайтимизда телеграм каналларда тарқалган видео ҳақида ёзган эдик. Унда ёш болалар иштирокида кўча жанги акс этган эди. Телеграмдаги "Хушнудбек.уз" каналининг ёзишича воқеа тафсилотларига аниқлик киритилган.
Каналда ёзилишича ушбу воқеа билан боғлиқ янгилик 2016 йил октябрь ойида чет эл сайтларида эълон қилинган. Воқеа Қирғизистонда содир бўлган.
Хабарда айтилишича, Қирғизистоннинг Ўш вилояти Ўзган туманида яшовчи икки нафар шахс фарзандларини қонга белангунча муштлаштиргани учун қамоққа олинган.
Қўлга олинганлар ғишт қуйиш билан тирикчилик қилувчи ўзбек миллатига мансуб Ҳосилжон ва Бахтиёр исмли фуқаролар бўлган.
Болаларини мушлаштирган оталарнинг иши Ўзган туман прокуратурасида кўриб чиқилган. Туман прокурори Маматкарим Айтиқулов бу ишга қуйидагича муносабат билдирган:
- Улар “Балоғат ёшига етмаганлари тарбиялаш” бўйича мажбуриятларни бажармаганликда айбланяпти. 156-модда, балоғат ёшига етмаганларни жиноятга жалб қилиш. 234-модда, безориликда айбланишяпти. Яқин орада жиноий иш судга юборилади, - деган Маматкарим Айтиқулов.
Канал админстраторининг маълум қилишича, интернетда суд натижалари ҳақида маълумот топилмаган.
Хуллас, бу воқеа бизда бўлмаган, содир этганлар эса Қирғизистон прокуратураси томонидан ушланиб, катта эҳтимол билан тегишли жазосини олган, дейилади телеграм канал маълумотида.
