Кеча, 17 июнда Ахборот ва оммавий коммуникациялар агентлигида Ўзбекистон Бош прокурори ўринбосари Эркин Йўлдошев ва журналистлар иштирокида интервью ташкил этилди. Унда мамлакатимизда коррупцияга қарши курашиш борасида амалга оширилаётган ислоҳотлар, коррупциянинг олдини олиш масалалари муҳокама қилинди.
Унда Бош прокурур ўринбосари Эркин Йўлдошев таълим жараёнидаги коррупциялар ҳақида гапирди.
"2018 йилда олий ва ўрта махсус таълим тизимида 67 ходимга нисбатан, улардан 34 нафарига талон-тарож қилиш, 15 нафарига фирибгарлик ва қолган 15 нафарига пора олиш моддалари билан жиноят иши қўзғатилган.
Масалан, собиқ Тошкент фармацевтика институти ректори ва унинг иккита проректорлари 2,5 млрд сўмни талон-тарож қилганликда гумонланмоқда. Ўзбекистон миллий университетининг декани ва унинг ўринбосари абитуриентни қўшимча жойга ўқишга олиб киришга ваъда бериб 2000 доллар пора олган", - деди Йўлдошев.
Эслатиб ўтамиз, 2001-2017 йилларда Тошкент фармацевтика институти ректори бўлиб ишлаган А.Н.Юнусходжаев 2017-2018 йилларда Ўзбекистон Президентнинг давлат маслаҳатчиси лавозимида ҳам ишлаган.
