Бош прокуратура Жиззах вилоятида содир бўлган жиноят юзасидан маълумот берди.
Маълум бўлишича, 2019 йил 29 июнь куни соат 10-30 ларда 1995 йилда туғилган фуқаро Ж.Қ. Жиззах вилоят болалар кўп тармоқли тиббиёт маркази хирургия бўлимига келиб, бўлим мудири 1968 йилда туғилган Т.Ҳ. 26 июнь куни “эхинокок” ташхиси билан операция қилиши натижасида 2005 йилда туғилган укаси вафот этганлиги сабабли, қасддан ўлдириш мақсадида ўзи билан олиб келган ошхона пичоғи билан Т.Ҳ.нинг кўкрагига ва қорин қисмига бир неча марта пичоқ билан уриб, тан жароҳати етказган вақтида бўлим шифокори Б.Ғ. уларни ажратиб қолиши натижасида Ж.Қ. жиноий мақсадини охирига етказа олмасдан воқеа жойидан қочиб кетган.
Шифокорлар томонидан ўз вақтида кўрсатилган малакали тиббий ёрдам натижасида Т.Ҳ.нинг ҳаёти сақланиб қолинган.
Тезкор-қидирув тадбирлари натижасида Ж.Қ. Зафаробод тумани, “Узун” қишлоғида ушланиб, ошхона пичоғи ашёвий далил сифатида олинган.
Мазкур ҳолат юзасидан Жиззах шаҳар прокуратураси томонидан ўша куннинг ўзида Жиноят кодексининг 25, 97-моддаси 1-қисми билан жиноят иши қўзғатилиб, тергов ҳаракатлари ўтказилмоқда.
Ж.Қ тегишли процессуал тартибда ушланган.
