Қорақалпоғистон Республикаси Нукус туманида ЙТҲ содир этиб, йўловчининг умрига зомин бўлган ҳайдовчи қидирилмоқда. Бу ҳақда EVERYDAY.UZ мухбири ИИВ ахборотига таяниб хабар қилмоқда.
Маълум бўлишича, 2019 йил 30 июнь куни соат 05:25ларда номаълум ҳайдовчи аниқланмаган автомашинани Қорақалпоғистон Республикасининг Нукус тумани Ақманғит ОФЙ ҳудудидан ўтувчи “Нукус-Ақманғит-Кегейли” йўлида ҳайдаб кетаётиб пиёда, Нукус тумани Кўк-тау МФЙда яшаган 35 ёшли Жиенбай Бекмуратовни уриб юбориб, воқеа жойидан қочиб кетган.
Натижада пиёда Жиенбай Бекмуратов касалхонага ётқизилган ва кўрсатилган тиббий муолажаларга қарамай вафот этган. Ҳолат юзасидан жиноят иши қўзғатилиб, ушбу йўл-транспорт ҳодисасини содир этган номаълум ҳайдовчини аниқлаш ва ушлаш чоралари кўрилган. Ҳозирда тергов ҳаракатлари олиб борилаётгани маълум қилинди.
Шу ўринда ИИВ ушбу ҳодисага гувоҳ бўлган бўлсангиз ёки ушбу ҳодисага алоқадор, шунингдек мазкур йўл-транспорт ҳодисасини содир этган шахс ва унинг автомашинаси ҳақида бирон-бир маълумотга эга бўлсангиз ички ишлар органларининг ҳудудидий бўлинмаларига ёки “102” телефон рақамига хабар беришингизни сўраб қолади.
