Жорий йилнинг июнь ойида Жиззах вилоят Зомин тумани Даштобод шаҳридаги 50-мактабнинг 6-синф ўқувчиси Э.С. онасининг маълум қилишича, ўз жонига қасд қилишга уринган. Аёлнинг айтишича, унинг қизи синф раҳбари синфдошларидан ажратиб яккалаб қўйганидан кейин шундай йўл тутишга қарор қилган, деб ёзмоқда aniq.uz.
Олтинчи синф ўқувчиси Э.С. кўплаб ухлатадиган таблеткаларни ичиб ўз жонига қасд қилишга уринган. Бу ҳақда ўқувчининг онаси 48 ёшли Ш.Х. маълум қилган. Аёл воқеадан бироз олдин уни уйдан маҳаллий милиция идораларига олиб кетишганини айтди.
- Қизим ўқийдиган мактабнинг раҳбарияти мен уларнинг фарзандлари ғаётини хавфга қўйганим ҳақида тухматдан иборат ариза ёзишган экан... Уйга қайтганимда фарзандларим ҳали уйғоқ эди. Шу кеча қизим мени айнан у сабаб қамаб қўйишган деб ўйлаган ва менинг ухлатадиган доримдан 5-6 таблеткани ичиб юборган. Эрталаб столда бўш уйқу таблеткалари идишини кўрдим ва қўрқиб кетдим. Қизимнинг хонасига югуриб бордим у ўз кроватида ётар, оғизлари қийшайган, кўзларининг оқи кўриниб турарди. Қўшнининг машинасида касалхонага олиб бордик. У ерда қизимнинг ошқозонини ювишди, бир ҳафтача шифохонада даволанди, дейди ўқувчининг онаси.
Аёл воқеада қизининг синф раҳбари Раъно Қодировани айбламоқда. Онанинг айтишича, синфни таъмирлаш учун пул беришдан бош тортгани учун ўқитувчи қизига босим ўтказа бошлаган.
Э.С. ўқийдиган 50-мактабнинг психологи ўз жонига қасд қилишга уринган қизнинг онаси айтган гапларни тасдиқлади. У, шунингдек, 50-мактаб раҳбарияти бу ўқувчи қизнинг 3 ой давомида мактабга келмагани ҳақида психологга хабар бермаган.
50-мактаб ўқитувчиси Раъно Қодирова ўзига қўйилган барча айбларни рад этиб, ўқувчисининг жонига қасд қилишида ўзининг ҳеч қандай айби йўқлигини айтмоқда.
Туман халқ таълими бўлимидан хабар қилишларича, олтинчи синф ўқувчисининг ўз жонига қасд қилишга уриниши воқеаси юзасидан мактаб маъмурияти ва ўқитувчиларга тегишли жазо чоралари кўрилган.
