Сурхондарё вилоятида “Ангор пахта тозалаш” АЖ директори 2,5 миллиард сўмга яқин маблағни талон-торож қилган.
Аниқланишича, судланувчи “Ангор пахта тозалаш” АЖ бош директори вазифасида ишлаш чоғида “ПК-17” қабул варақаси ва “7-ХЛ” шаклидаги пахта ҳаракатини ҳисобга олиш дафтарларининг тегишли қисмини тўлдириб, қалбакилаштирган. Ҳужжатнинг сохталигини билган ҳолда, қабул қилинмаган пахта хомашёси учун тўловни амалга оширишга асос бўлувчи расмий ҳужжат сифатида банкка топширган. Тақдим қилинган ҳужжатлар асосида 1 894.4 тонна пахта хомашёси учун фермер хўжаликларининг ҳисоб-рақамларига 2 406 863 000 сўм ўтказишга эришган. У хизмат мавқеини суиистеъмол қилиб, давлат маблағларини талон-торож қилган, дея баҳоланган.
Собиқ директорга 167-моддаси 3-қисмининг “а” банди ва 209-моддасининг 1-қисмида назарда тутилган жиноятни содир қилган деб топилди.
Унга нисбатан:
– 1 йил муддатга мансабдорлик ва моддий жавобгарлик ишларида ишлаш ҳуқуқидан маҳрум қилиш;
– 2 йил 6 ой муддатга ахлоқ тузатиш ишлари (иш ҳақининг 30 фоизини давлат даромадига ушлаб қолиш шарти билан) жазоси тайинланди.
Етказилган зарар тўлиқ қопланганлиги инобатга олинган. Ҳукмдан норози томонлар тегишли тартибда шикоят бериш тартиби тушунтирилди.
