Ижтимоий тармоқларда 13 сентябрда «Ҳокимларга орден берилишини танқид қилган блогер 10 кунга қамалди» деган хабарлар тарқалди. Андижон вилояти ИИБ мазкур вазиятга расмий муносабат билдирди, деб хабар бермоқда «Дарё».
Блогер Нодирбек Ҳожиматов сентябрь ойи бошларида Шаҳрихон туманидаги «Қум» маҳалла фуқаролар йиғини ҳудудида «Обод маҳалла» давлат дастури доирасида қурилиш-таъмирлаш ишлари сифатсиз амалга оширилгани ва ерга ажратилган пул маблағлари ўзлаштирилиб юборилгани ҳақида ижтимоий тармоқларга хабарлар жойлаштирган.
Андижон вилояти ИИБдан маълум қилишларича, бу хабарлар ёлғон ва асоссиз бўлиб, бу билан у Шаҳрихон тумани ҳокими Ҳикматилло Дадахоновга туҳмат қилган. Шунингдек, блогер 7—9 сентябрь кунлари Шаҳрихон туман ҳокимлиги маъмурий ҳудудига бир неча бор келиб, жамиятда юриш-туриш қоидаларини менсимай, туман ҳокими Дадахоновнинг шаъни ва қадр-қимматини қасддан камситган.
Юқоридаги хатти-ҳаракатлари учун фуқаро Нодирбек Ҳожиматов 12 сентябрь куни Маъмурий жавобгарлик тўғрисидаги кодекснинг 40 (туҳмат), 41 (ҳақорат қилиш), 183-моддалари (майда безорилик) билан маъмурий жавобгарликка тортиш ҳақида ҳужжатлар расмийлаштирилиб, ушбу ҳужжатларни мазмунан кўриб чиқиш учун Шаҳрихон туман маъмурий судига юборилган.
Суд 12 сентябрь куни Нодирбек Ҳожиматовни юқоридаги моддалар бўйича айбдор деб топиб, унга нисбатан 13 сутка маъмурий қамоқ жазоси тайинлаган.
