Тошкентнинг Яшнобод туманида "Тез ёрдам шифокорлари" аёвсиз калтакланди.Бу ҳақда ССВ хабар қилди.
Маълум бўлишича, жорий йил 25 сентябрь куни соат 22.01 да Тошкент шаҳар “Тез ёрдам” станцияси “Call-маркази”га Яшнобод тумани Боткина кўчаси 4- уй, 38-хонадонда яшайдиган А.Анинг аҳволи оғирлашгани ҳақида қўшниси хабар берган. Бу маълумот зудлик билан Яшнобод тумани 3-подстанциясига етказилади ва “Тез ёрдам” бригадаси соат 22.18 да айтилган манзилга етиб борган.
Врач Қ.С. ва фельдшер М.О. бемор А.А.ни кўрикдан ўтказганида у вафот этгани маълум бўлади. Бироқ, беморнинг яқинлари шифокорлардан беморга укол қилиш, реанимация ёрдами кўрсатишни талаб қилган. Шифокорлар уларга бу фойдасиз эканини тушунтиришига қарамасдан, беморнинг яқинлари тиббиёт ходимларига таҳдид қилишда давом этган. Шунда фельдшер М.О. уйнинг йўлагига қочиб чиққан. Беморнинг яқинларидан уч киши унинг ортидан қувиб, йўлакда уни калтаклаган.
Натижада М.О. жиддий тан жароҳати олиб, йўловчи машинада Тошкент тиббиёт академияси клиникасига борган. У ерда фельдшерга биринчи тиббий ёрдам кўрсатилиб, олган тан жароҳати оғир бўлгани учун Республика шошилинч тиббий ёрдам илмий марказига юборилган. Беморга бош мия ёпиқ жароҳати, юз-жағ жароҳати, кўкрак қафаси ёпиқ жароҳати, буйрак жароҳати ташхиси қўйилган. Шифокор Қ.С. ҳам жиддий тан жароҳати олгани боис, айни пайтда даволанмоқда, дейилади вазирлик ахборотида.
Вазирликнинг қўшимча қилиишча, мазкур ҳодиса юзасидан Тошкент шаҳар прокуратурасига мурожаат йўлланган.
