Фарғона вилояти Қува туманида оммавий муштлашув содир бўлди.
Маълум бўлишича, шу йил 1 ноябрь куни соат 20.00ларда Ф.Тожибоев таниши М.Назаров билан жанжаллашиб қолган ва унинг натижасида Назаров Тожибоевни уриб-дўппослаган. Шундан сўнг Тожибоев бу ҳақда таниши Ж.Сиддиқовга айтган. Сиддиқов эса Назаровнинг таниши Ж.Юлдашевга телефон қилиб уларни яраштириб қўйишмоқчи бўлган ва «Хонобод» МФЙ ҳудудидаги «Қосим Карвон» фермер хўжалиги дала майдонига чақирган. Айтилган жойга Юлдашев 2 ноябрь соат 02:10 ларда танишлари Ж.Баҳриддинов, М.Назаров, Ж.Маҳаммаджоновлар билан келган.
Музокара давомида жанжал келиб чиққан ва Сиддиқов Муҳаммаджоновни пичоқлаб ташлаган. Шундан сўнг Муҳаммаджоновнинг аҳволи оғирлашаётганини кўрган Сиддиқов уни йўловчи машинада шифохонага юборади. У ерда эса Муҳаммаджонов 2 ноябрь соат 03:05ларда вафот этади.
2 ноябрь куни Сиддиқовга нисбатан ЖКнинг 104-моддаси 3-қисми «д» банди билан жиноят иши қўзғатилган.
Ушбу ҳолат устидан ҳозирда Фаргона вилоят прокуратураси томонидан назорат ўрнатилган.
