Тошкентда 2 нафар маҳкум соқчидан дўконга чиқиб келишни илтимос қилиб, кўчада яна жиноят содир этди .
Маълум бўлишича шу йил 3 август куни Бўка туманидаги 43-сонли манзил колониясида жазони ўтаётган Руслан Маратов ва Сергей Папановлар (исм-шарифлар ўзгартирилган) яна жиноят содир этган. Улар аввал содир этган жиноятлари учун амнистияга “илиниб” Қизилтепа туманидаги жазони ижро этиш муассасасидан Бўкага кўчирилган бўлган.
Маратов ва Папановлар шу йил 3 августда пойтахтнинг Учтепа туманида қўриқлаш остида бўлган «Мега стар голд» МЧЖда ишлаб жазо муддатини ўтаётган бўлган. Шундан сўнг улар ўша куни кеч соат 22:00 ларда соқчини бир амаллаб кўндириб дўконга чиқиб кетишган. Икковлон кўчага чиққандан фойдаланиб пивохорлик қилишган ва тунги соат 02:30 ларда Юнусобод туманида “Мазда 3” автомобилини олиб қочишган ва унинг ичидаги «Аdidas» номли оқ-қора кийими, 450 АҚШ доллари, 31 Хитой юани, 400 долларлик «Iphone7» русумли уяли телефони, ҳисоб рақамида 3 000 АҚШ доллари бўлган Хитой виза картаси, 160 долларлик эшитиш мосламаси, 25 долларлик кўзойнак, нархи 110 долларга тенг «Dior» атирини ҳам ўғирлаб кетишади. Автомашнинани эса кўчада қолдириб яна ЖИЭМга қайтишади.
Ўша воқеадан сўнг жабрланувчи ҳуқуқ тартибот органларига мурожаат қилган ва икки махбус ушланган.
Маҳкумларга суд ҳукми ўқилди. Уларга ўталмай қолган жазоларини ҳам қўшиб Маратовга 11 йил 2 ой, Папановга эса, 10 йил 2 ой қамоқ жазоси тайинланди.
Шу билан бирга маҳкумларни назоратсиз қолдирган ИИБ ходимига нисбатан хусусий ажрим чиқарилди. Маратов ва Папанов ўта хавфли рецидивист деб топилди.
