Ижтимоий тармоқларда Мингбулоқ тумани ҳокими Нуршод Худойбердиевнинг овози дея аудиоёзув тарқатилган эди. Унда ҳоким фермерларни сўкканини эшитиш мумкин.
Олиб борилган суриштирув натижасида овоз ҳақиқаттан ҳокимга тегишли экани аниқланди. “Дарё”нинг маълум қилишича ҳокимнинг сўкишлари техникаларини келгуси йил тайёргарлиги доирасида таъмирлаш учун дислокация бўйича белгиланган саройга олиб келмаган фермерларга қаратилган.
Хабар қилинишича Наманган вилояти ҳокими Хайрулло Бозоров ва вилоят прокурорининг ўринбосари Шуҳрат Қосимов ҳамда бошқа мутасаддилар иштирокида йиғилиш ўтказилган. Унда ҳокимнинг хатти-ҳаракати кескин танқид қилинган. Вилоят ҳокими Худойбердиевнинг бундай ҳаракатини кескин қоралаб, зўравонлик сиёсати эски даврда қолиб кетганини айтиб, ҳеч ким бировни ҳақоратлашга, шахсиятига тегишга ҳаққи йўқлигини таъкидлаган.
Туман ҳокими ҳам йиғилишда сўзга чиқиб айбини тан олган. Қилган иши учун барчадан узр сўраб, бундай ҳолат бошқа такрорланмаслигига ваъда берган.
Вилоят прокуратураси эса аудиоёзувни ўрганиб, маъмурий жавобгарлик жиҳатини аниқлаши ҳамда қонуний чора кўришни амалга ошириши маълум қилинди.
