Аввалроқ ижтимоий тармоқларда қўқонлик киракаш уйидан чиқиб қайтиб келмагани ҳақида хабарлар тарқалган эди. Бош прокуратуранинг хабар қилишича такси ҳайдовчиси ўлдириб кетилган.
Жорий йил 5 январь санасида қўқонлик К.Юлдашев уйидан чиқиб кетиб, қайтиб келмаганлиги юзасидан 6 январда хотини Б.Давидова Оҳангарон туман прокуратурасига мурожаат қилиб амалий ёрдам сўраган.
Ҳолатни ўрганиш жараёнида Юлдашев 5 январ куни соат 23:02да қизига қўнғироқ қилиб Оҳангарондан Бешариқ туманига одам олиб қайтиб келаётганини айтгани ва шундан сўнг телефони ўчирилгани маълум бўлган.
Шундан сўнг тезкор қидирув тадбирлари бошланган ва 7 январь санасида соат 18:00 ларда Юлдашевнинг “Кобалт”и (давлат рақами 40Z075RA) Оҳангарон шаҳри Янгиобод маҳалласидан топилган. Кузатув натижасида эса машинадан қонга ўхшаш қизғиш доғлар ва жилдлар ашёвий далил сифатида олинган ва ҳолат юзасидан ўша куниёқ жиноий иш қўзғатилган.
Эртаси куни, 8 январда Юлдашевнинг мурдаси машина топилган ҳудуддан 18 км узоқликда Оҳангарон тумани, Телов маҳалласи ҳудудидан оқиб ўтувчи «Ангрен» дарёси устидан ўтувчи «Нуробод-Телов» автомобиль йўлидаги кўприкдан ўнг томонда, дарё ўзани чап томонидаги чакалакзордан топилган. Мурда яланғоч ҳолда бўлган. Унинг танасининг олди ва орқа томонига 7 мартадан ўткир тиғли жисм билан жароҳат етказилгани аниқланган.
Ҳозирда жиноятни фош этиш чоралари кўрилмоқда, дея хабар қилди хабар.уз.
Жиноят иши Бош прокуратура назоратида экани айтилмоқда.
