ДХХ Самарқанд вилояти бошқармаси, Бош прокуратура ҳузуридаги Мажбурий ижро бюроси ва вилоят ички ишлар бошқармаси ҳамкорлигида ўтказилган тезкор тадбир давомида Самарқанд туманида яшовчи “Р.Б.” ўзининг 19 сотих майдондаги иссиқхонасида табиий газдан фойдаланиш учун тегишли рухсатнома олмасдан, иссиқхонаси ёнида жойлашган Қуролли Кучлар кичик мутахассисларни тайёрлаш маркази автодроми ҳудудидан ўтувчи 500 диаметрли табиий газ қувурига яширин равишда уланиб олган. Натижада давлатга қарийб 362,5 млн. сўмлик зарар етказган.
Шунингдек, “Р.Б.”нинг қинғирлиги айрим фуқароларга ҳам қўл келган. Унинг ўғринча газ қувурига уланган ҳолда ўз иссиқхоналарини иситган шахслар – “М.С.” 324 млн. сўм, “А.Ж.” 591 млн. сўм, “В.Д.” 553 млн. сўм ҳамда “Б.И.” 763 млн. сўм - жами 2,5 млрд. сўмдан зиёд миқдорда давлатга зарар етказган.
Шунингдек, Пастдарғом туманида ўтказилган тезкор тадбир давомида “Р.Л.” 1,4 гектарлик майдондаги иссиқхонасида табиий газдан ноқонуний равишда фойдаланилиб келганлиги аниқланди. Яъни, у маҳаллий аҳолига газ етказиб берувчи 159 диаметрли ўрта босимли газ қувурига 50 диаметрли газ қувурини ер остидан улаб олган. Натижада давлат манфаатларига 2,4 млрд. сўмдан зиёд миқдорда зарар етказган.
Ҳозирда қайд этилган ҳолатлар юзасидан тергов-суриштирув ҳаракатлари олиб борилмоқда.
