Аввалроқ Бухорода ўзини пайғамбар деган аёлга суд ҳукми ўқилгани ҳақида хабар берган эдик. Маълумот "Ҳуқуқ" газетасидан олингани, унда тафсилотлар бироз қисқача ёритилгани тармоқларда эътирозларга сабаб бўлди.
Бугун "Дарё" нашрида воқеа тафсилотлари батафсилроқ ёритилди. Маълум бўлишича, вилоятнинг Шофиркон тумани Жўйнав қишлоғида яшовчи аёл Д.Й. ўтган йил, 2019 йил декабр ойида ўзини пайғамбар деб эълон қилган. Аёл дастлаб ўзи исмини ошкор қилмаган ва шу асосда ўзига ваҳий келаётганини айтиб «Туҳфа» номли китоб ёзган. У ушбу китобни Аллоҳдан келган деб атаб, унда Муҳаммад (с.а.в.) охирги пайғамбар экани ва Қуръони карим илоҳий китоб эканини рад этган.
Аёл ушбу ишга қизи Бухоро давлат университетини тамомлаган Д.У. ва опаси Д.Й.ни ҳамда яна 4 нафар аёлни жалб қилган. Улар китобни қўлёзма шаклида кўчиришга ёлланган. Шу йўл билан шофиркорлик аёл ақидапарастлик билан йўғрилган маълумотларни тарқатиб, жамоат хавфсизлиги ва жамоат тартибига таҳдид соладиган материалларни тайёрлаш ва тарқатиш жиноятини содир этган.
Бундан ташқари унинг «Пайғамбар» деб тан олингани хусусидаги кўрсатмалари ёлғон ва асоссиз эканлиги фош этилган.
Аввал маълум қилинганидек, ушбу ҳарактлари учун, яъни жамоат хавфсизлиги ва тартибига таҳдид соладиган материаллар тайёрлаш ва тарқатиш жиноятини содир этишда айбланган Д.Й. Жиноят кодекси 244-1-моддасининг 2-қисмида кўрсатилган жиноятларни содир қилганликда айбли деб топилган. Унга 1 йил озодликни чеклаш жазоси тайинланган.
