ДХХ томонидан ҳамкор ташкилотлар билан биргаликда пойтахда кучли таъсир қилувчи дориларни ноқонуний сотаётган дорихоналар ва уларнинг раҳбарлари қўлга олинди.
Маълум бўлишича, Чилонзор туманидаги “ЕВРО МЕД ФАРМ” МЧЖга қарашли дорихона ва “ARRAKASTA GROUP” номли дорихоналар “Регапен”, “Селофен”, “Тропикамид” дориларини ноқонуний равишда сотган. Тезкор тадбиролар жараёнида ҳатто “ЕВРО МЕД ФАРМ” МЧЖга тегишли дорихона раҳбарининг втомашинасдан ҳам шундай дорилар топилган. Ушбу икки дорихонага А.Б. исмли шахс дориларни етказиб тургани аниқланган.
Шунингдек, Тошкентнинг Учтепа туманидаги “KAMOLA-XUR INVEST” МЧЖга қарашли дорихона ҳам махсус рухсатномага эга бўлмасада мижозга 1 дона “Селофен” капсуласини 20 минг сўмга сотаётганда ашёвий далиллар билан ушланган. Кейинчалик дорихона текширилганда у ерда 3139 дона “Селофен” ва 923 дона “Регапен” дорилари борлиги маълум бўлган.
Бундай дорилар аслида тегишли рухсатномалар билан сотилиши ВМнинг қарорида ҳам белгилаб қўйилган. Лекин айрим дорихоналар мана шундай қинғир ишларга қўл урмоқда. Бу эса ўз навбатида фуқаролар ҳаётига зарар. Кучли таъсир қилувчи дориларни кўп итсеъмол қилиш, унинг дозасини ошириб юбориш ўлимга ҳам сабаб бўлиши мумкин. Энди қинғир ишни қилганлар қонун оллдида жавоб беради.
