Жиззахда аёл 4 нафар қизни қўрқитиб, фоҳишалик қилишга мажбурлаб келгани маълум бўлди. Бу ҳақда "Постда" нашри хабар қилди.
Ҳуқуқ тартибот органлари ходимлари томонидан олиб борилган тезкор тадбир натижасида Жиззах шаҳрининг Иттифоқ маҳалассидаги уйда 29 ёшли аёл икки эркак билан жинсий алоқа қилаётган вақтда қўлга олинган. Маълум бўлишича, уни 38 ёшли жиззахлик аёл фоҳишаликка мажбурлаган. Кейинчалик ойдинлик киритилишича, аёл жиззахлик турмушидан ажрашган 29 ва 25 ёшли аёлларни ҳамда фарғоналик 18 ҳамда 17 ёшли қизларни фоҳишалик қилишга мажбур қилган. Аёл аслида қизларни иш топиб беришни ваъда қилиб, чақиртириб олгани маълум бўлди. Қизлар фоҳишалик қилишдан бош тортса, аёл уларни уриб, маҳалладошларига айтиб бериш билан қўрқитиб келган. Шунингдек, 38 ёшли аёл қизларга мижоз топиб бериш билан шуғулланган ва уларнинг "хизмати"ни 100 минг сўмга баҳолаган.
Ҳолат бўйича ЖКнинг тегишли моддалари билан жиноий иш қўзғатилган.
