Навоий вилояти ИИБ УЯ 64/29-сонли жазони ижро этиш муассасасида қайд этилган жиноят ҳуқуқ-тартибот идораларининг тажрибали ходимларини ҳам ҳайратга солиши шубҳасиз, дея хабар қилмоқда EVERYDAY.UZ мухбири “Халқ сўзи” ахборотига таяниб.
Ушбу муассасада жазо муддатини ўтаётган маҳкум билан учрашувга келган турмуш ўртоғи К. Б.нинг ёнида бўлган нарса ва олиб келган буюмлари ЖИЭМ ходимлари томонидан кўздан кечирилганда, целлофан пакетдаги дорилар орасидан 14 дона “Трамадол Ланнахер” дориси мавжудлиги аниқланиб, холислар иштирокида далилий ашё сифатида расмийлаштирилди.
“Экспертиза хулосасига “Трамадол Ланнахер 50 мг” таблеткаларида трамадол 0,05 грамм бўлиб, 14 та таблеткадаги трамадолнинг умумий оғирлиги 0,7 граммни ташкил қилади. “Трамадол” Ўзбекистон Республикаси Вазирлар Маҳкамасининг 2018 йил 27 октябрдаги 878-сонли қарорининг 2-рўйхатига кўра, Республика ҳудудида муомаласи чекланган гиёҳвандлик воситалари рўйхатига киритилган”, - дейди вилоят ИИБ матбуот хизмати раҳбари Ўктам Усмонов.
Мазкур ҳолат юзасидан маҳкумнинг турмуш ўртоғи К.Б.га нисбатан Ўзбекистон Республикаси Жиноят Кодексининг 276-моддаси 2-қисми билан жиноят иши қўзғатилди.
Хулоса ўрнида таъкидлаш жоизки, К.Б. тиббиёт ходими бўлиб, дориларнинг фармакологик хусусиятларини яхши билганлиги шубҳасиз. Афсуски, жазо муқаррарлигини билмаган, шекилли.
