ДХХ томонидан Тошкент вилояти, Фарғона, Қашқадарё вилоятларида кучли таъсир этувчи дори воситаларни сотиш билан шуғулланган фуқаролар қўлга олинди.
Маълум бўлишича, дастлаб ходимлар томонидан Тошкент туманида ёнида 150 дона “Трамадол” дори воситаси бор бўлган 36 ёшли эркак қўлга олинган. У ушбу дорининг ҳар бирини 7 минг сўмдан сотишни режалштирган.
Шунингдек, тезкор тадбирлар натижасида Қўқонда ҳам кучли таъсир қилувчи дориларни сотган фуқаролар ушланган. Хусусан, 26 ёшли қўқонлик йигит 300 дона “Соннат” дори воситасини 1,4 млн. сўмга сотган вақтда ушланган. Кейинчалик маълум бўлишича, йигитнинг ёнида яна 300 дона дори воситаси топилган. Яна бир ҳолатда Қўқонда яшовчи бошқа бир 28 ёшли йигит дори сотишга 18 ёшли синглисини ҳам аралаштиргани маълум бўлди. Улар 1400 дона “Регапен” кучли таъсир этувчи дорисини сотиш учун уйига яшириб қўгани аниқланди ва уларнинг ушбу дорилари процессуал тарзда расмийлаштириб олинди.
Дори воситалари йўлда кетаётган автомашиналарни тўхтатиб текширилганда ҳам топилган. Хусусан, “Қўқон-Фарғона” йўлида кетаётган "Жентра" Учкўприкда тўхтатилганда унинг ичидаги йўловчида 280 дона “Регапен” ва 336 дона “Лирика” дори воситалари борлиги аниқланган. Фуқаронинг уйи текширилганда эса у ердан яна 84 дона “Регапен” дори воситаси олинган. Шунингдек, карантин даврида фарғоналик бир гуруҳ йигитлар Тўрақўрғонда 215 дона флакондаги “Тропикамид” дори воситасини сотиб олиб, Қўқон шаҳрига олиб кирмоқчи бўлишганда ушланган.
ДХХ томонидан олиб борилган тезкор тадбирлар натижасида Қашқадарёда ҳам шундай дорилар савдоси билан шуғулланганлар қўлга олинди. Жумладан, 29 ёшли йигит бошқариб кетаётган Исузу Ғузор туманида тўхтатиб текширилганда машина юкхонасида 1000 дона “Тропикамид” дори воситаси борлиги маълум бўлди. Суриштирувлар натижасида йигит ушбу дорини Тошкентдан олиб Деновга "мижозга" олиб борётгани маълум бўлди. Тадбир давом эттирилиб, Деновдаги "мижоз" ҳам қўлга олинди.
Ушбу ўтказилган тезкор тадбирлар натижасида ДХХ томонидан умумий ҳисобда 150 дона “Трамадол”, 600 дона “Соннат”, 1764 дона “Регапен”, 1215 дона “Тропикамид” ва 336 дона “Лирика” дори воситалари мусодара қилинди.
