Ўзбекистонда собиқ директор, политолог Рафик Сайфулин давлатга хоинлик қилишда айбланиб, 12 йилга қамалди. Бу ҳақда Олий суд матбуот хизмати хабар қилди.
Маълум бўлишича, Ўзбекистон Республикаси Ҳарбий суди томонидан политолог, Стратегик ва минтақалараро тадқиқотлар институтининг собиқ дирекори Р. Сайфулинга нисбатан суд ҳукми ўқилган. Сайфулин ЖКнинг 157-моддаси (давлатга хоинлик қилиш) 1-қисми ва 248-моддаси (қурол, ўқ-дорилар, портловчи моддалар ёки портлатиш қурилмаларига қонунга хилоф равишда эгалик қилиш) 1-қисмида назарда тутилган жиноятларни содир этганликда айбланган.
"Бир неча ой давомида ўтказилган ёпиқ суд мажлисида судланувчи ва гувоҳларнинг кўрсатмалари тингланиб таҳлил қилинди.
Тергов органи томонидан тўпланган далилларга баҳо берилиб, судланувчининг важлари текширилди.
Суд судланувчи Р. Сайфулинни юқорида кўрсатилган жиноятларни содир этганликда айбли деб топиб, унга 12 йил муддатга озодликдан маҳрум қилиш жазосини тайинлади", - дейилади Олий суд матбумот хизмати ахборотида.
Политолог 2019 йил июль ойида ҳибсга олинган.
Сайфулин ўз фаолиятини СССР давлат хавфсизлиги қўмитасида бошлаган. Ўзбекистон мустақилликка эришгандан сўнг эса Вазирлар Маҳкамаси тизимида, кейинчалик Стратегик ва минтақалараро тадқиқотлар институтида директор бўлиб ишлаган.
