ДХХ гиёҳвандлик моддалари савдоси билан шуғулланганларни қўлга олди. Бу ҳақда EVERYDAY.UZ мухбири хабар қилди.
Маълум бўлишича, ДХХ ходимлари томонидан Андижон-Қўқон йўлида Нексия-2 текширилганда унда 1978 й.т. Ҳадича Хурбоевага тегишли 5 кг «гашиш» гиёҳванд моддаси топилган. Аниқланишиича, ушбу модда аёлнинг қўлига қирғизистонлик "ҳамкасблари" томонидан етиб келган. Шундан сўнг аёлдан моддани қаерга олиб борилаётгани сўралганда у икки эркакка беришини маълум қилган. Уларнинг бири қўқонлик аввал гиёҳванд моддалар савдоси билан шуғулланиб 10 йилга қамалиб чиққан 42 ёшли Турсун Махсудовга экани аниқланди. Аёл унга модданинг 4 кг.ини бериши керак бўлган. Шунингдек, модданинг 1 кг.и 36 ёшли Азизбек Кауловга экани аниқланган. Фарғона туманида яшовчи Азизбек ҳам аввал қилган жинояти учун қамалган бўлган. Тезкор тадбир давомида ушбу икки эркак ҳам ушланган.
Шунингдек, тадбирлар давомида ДХХ томонидан Андижоннинг “Уйғур” қишлоғида 587 гр. “гашиш” моддаси топилган. Ҳозирда бу модда кимга тегишли экани ўрганилмоқда.
Ушбу туманда гиёҳвандлик моддаси савдоси билан шуғулланувчи икки йигит ҳам қўлга олинган. Элдорбек Эргашев ва Аҳрорбек Ҳасановлар 504 гр. «гашиш» моддаси билан қўлга тушган. Улар бу моддани қирғизистонлик фуқаролардан олган бўлган.
Хабар қилинишича, гиёҳванд моддалари савдоси билан боғлиқ ҳолат Хоразм ва Қорақалпоғистонда ҳам кузатилган. Хусусан, Гурлан туманида "Ласетти" текширилганда у ердан 50 ёшли Икром Муратовга тегишли бўлган 997 гр. “опий” гиёҳвандлик воситаси топилган. Эътиборли жиҳати, Муратов ҳам аввал гиёҳванд моддалар билан боғлиқ жиноят содир этганлиги учун ҳозирда озодликни чеклаш жазосини ўтаётган бўлган.
Қорақалпоғистоннинг Нукус шаҳрида ўтказилган тезкор тадбирда эса 35 ёшли Шараф Aлимбетов 5,6 гр “гашиш” моддасини 400 минг сўмга сотаётган вақтда қўлга олинган. Суритшитрув жараёнида Шараф ушбу моддани 45 ёшли Куралбай Шамуратовдан олганини айтган. Куралбайнинг уйи текширилганда эса у ердан 285,4 гр. “гашиш” моддаси топилган.
Ўзбекистон бўйлаб ҳуқуқ тартибот органлари томонидан ўтказилган тадбирлар давомида 6 кг 382 гр. “гашиш” ва 997 гр. “опий” гиёҳванд моддалари мусодара қилинди.
Юқорида келтирилган ҳолатларнинг барчаси бўйича ЖКнинг тегишли моддалари билан жиноий иш қўзғатилган.
