Андижонда бир гуруҳ ўсмирлар 17 ёшли йигитни машинага солиб, ҳеч ким йуқ жойда пичоқ ва таёқ билан қўрқитиб пулини талон-тарож қилди. Бу ҳақда ИИВ Тергов департаменти хабар қилди.
Маълум бўлишича, Асака туманида шу йил 4 июль куни соат 14:00 да 21,20 ва 2 нафар 19 ёшли ўсмирлар кўчада кетаётган 17 ёшли вояга етмаган болани Нексияга солиб, ҳеч ким йўқ жойга олиб бориб, таёқ ва пичоқ билан қўрқитиб, унинг 430 минг сўм пулини олиб қўйган.
Шундан сўнг ҳолат юзасидан ҳуқуқ тартибот органи ходимлари томонидан жиноят иши қўзғатилиб, ўсмирлар ушланган. Тергов пайтида 20 ёшли йигитдан бир дона пичоқ ва таёқ топилган.
Ҳозирда уч нафар йигитга нисбатан ЖКнинг 164-моддаси 3-қисми «а,б» бандларига (қурол ёки қурол сифатида фойдаланиш мумкин бўлган бошқа нарсаларни ишлатиб, бир гуруҳ шахслар томонидан олдиндан тил бириктириб содир этилган босқинчилик) кўра жиноий иш қўзғатилган. 19 ёшли 1 нафар ўсмирга нисбатан эса ҳудди шу модданинг айни шу қисмининг «а» бандига (такроран ёки хавфли рецидивист томонидан содир этилган босқинчилик) кўра айб эълон қилинган. Барча ўсмирлар қамоққа олинган.
