Ота-оналар Самарқанд давлат университети фаолияти билан танишди. Ўқув жараёнларида иштирок этиб, лабораториялар, кутубхона, музейлар, ётоқхоналарни кўздан кечирди.
Самарқанд давлат университети ректори, Ўзбекистон Республикаси фан арбоби, Олий Мажлис Сенати аъзоси Рустам Холмуродов ғояси асосида яратилган фильм ота-оналар эътиборига ҳавола қилинди. Фильмда оддий оиладан чиқиб, билим олиш орқали юқори натижаларга эришган қаҳрамонларнинг ҳаёт йўли акс эттирилган.
Фильм намойишидан сўнг Самарқанд давлат университети ректори Рустам Холмуродов ота-оналар билан мулоқот қилиб, ота-онанинг фарзанд тарбиясидаги роли, чет тилларини ўрганишнинг аҳамияти, талабаларга яратилган шароитлар ҳақида алоҳида тўхталди.
- 2004 йил Самарқанд давлат университети математика факультетини тамомлаганман, - дейди Малика Қўшназарова. – Қизим, Рухшона СамДУ география ва экология факультети 1-курс талабаси. Университетни аввалги ва ҳозирги ҳолатини таққосладим. Жуда катта ўзгаришлар бўлган. Ҳашаматли бинолар қад ростлаган. Хоналар замонавий, рақамлаштирилган. Ўқиш учун барча шароит етарли. Болаларимизнинг янада яхшироқ ўқиши учун биз университет билан ҳамкорлик қилишимиз лозим.
- Ота-оналар билан учрашувда фильм намойиш этилди. Фильм қаҳрамонларининг ҳаёти ота-оналар учун ўрнак, - дейди Шоира Мўминова. – Ҳар бир фильм қаҳрамони ночор оиладан чиқиб, соҳаси бўйича юқори чўққиларни забт этган. Бунга уларнинг яхши ўқиши, билим эгаллашдаги матонати ва ота-оналарининг қўллаб-қувватлаши сабаб бўлганига гувоҳ бўлдим. Ўғлим Бекзоднинг ўқиши учун энг яхши шароитларни яратиб бераман.
Самарқанд давлат университети
Ахборот хизмати,
Шавкат АКРАМОВ олган суратлар.
