Фожиа шу йил ноябр ойида Фарғона вилояти Бешариқ туманидаги мактаблардан бирида содир бўлган. Маълум бўлишича, ўшанда 10- синф ўқувчиси Миржамол Зокировни ҳарбий тайёргарлик бўйича муаллим Мирвоҳид Мардонов шафқатсизларча калтаклаган. Шунинг натижасида Миржамол 26 ноябр куни вафот этган. Марҳумнинг отаси маҳаллий прокуратурага шикоят аризаси билан мурожаат этиб, ўғлини уриб ўлдирган муаллим устидан жиноий иш қўзғатилишини талаб қилган. Улар орадан бирмунча вақт ўтиб ушбу факт юзасидан терговгача суриштирув ишлари олиб борилганини маълум қилишган. Бу ҳақда Hordiq.uz хабар қилмоқда.
Миржамол Зокиров ўқиган мактаб директори Сирожиддин Қўчқоров шундай дейди:
— Мен фожиа юз берган пайт малака ошириш курсида эдим. Қайтганимдан кейин Миржамолнинг ўлимидан хабар топиб жуда ҳайрон бўлдим. Негаки, Миржамол мактабимизнинг энг аълочи ўқувчиларидан бири эди. Хулқи ҳам аъло даражада. Қандай қилиб ўлиши мумкин? Мен ўзим мустақил тарзда текширув ўтказдим. Муаллим Мирвоҳид Мардонов билан алоҳида суҳбат ўтказдим. Лекин у дарс қолдиргани учун бир неча ўқувчиларга шунчаки пўписа қилганини айтди. Мен муаллимдан ҳақиқатни айтишини талаб қилдим. У «Мен Миржамолга қўл теккизмаганман», деб туриб олди.
Аммо Миржамолнинг синфдошларидан бири ҳарбий тайёргарлик бўйича муаллим Мирвоҳид Мардонов Миржамолни ҳақоратлаб, қаттиқ калтаклаганини баён қилди. Ўқувчининг таъкидлашича, кўкрак қафаси қисмига муаллим тарафидан йўлланган зарба туфайли Миржамол энгашганча нафас олишга қийнала бошлаган.
Марҳумнинг отаси Дилшод Мадраҳимов шундай дейди:
— Ўша куни ўғлим жуда ёмон аҳволда мактабдан қайтди. Олдинига у мендан ҳайиқиб, калтак еганини айтмади. Аммо эртаси куни тушга яқин мактабдан келди-ю, ерга юзтубан йиқилди. Касалхонага олиб борсам, дўхтирлар пешонасини ушлаб кўриб болам аллақачон оламдан ўтганини айтишди. Беш болам бор эди, тўрттасигина қолди. Мен прокуратурага мурожаат этиб, ўша муштумзўр муаллим устидан жиноий иш қўзғатишларини талаб қилдим. Майли, боламнинг қабрини очишсин, экспертиза ўтказишсин.
Мактаб директори ҳам сўзининг охирида бир гапни айтди.
Ҳарбий тайёргарлик бўйича муаллим Мирвоҳид Мардонов ҳозир ҳам мактабда ишлашда давом этмоқда
