Самарқандда 20 ёшли йигит фирибгарга алданиб қолди. Бу ҳақда ҳуқуқ тартибот органлари хабар қилди.
Маълум бўлишича, йигитга ургутлик 22 ёшли фуқаро Миллий гвардияга ишга жойлайман деб ваъда берган ва дастлаб ундан 27 200 доллар олган. Бу орада ургутлик йигит ишга жойлашни Миллий гвардиядаги таниши орқали ҳал қилишини айтган. Шундан сўнг ургутлик йигит ишга кириш илинжидаги йигитдан яна 300 доллар сўраган. Иш “пишавермагач” эса 20 ёшли йигит ҳуқуқ тартибот органларига мурожаат қилган. Аризада эса барчасини ёзиб берган. Шундан сўнг тадбир давомида ургутлик йигит 300 долларни олаётганда қўлга олинган.
22 ёшли ишга жойловчи фуқаро кейинчалик Миллий гвардияда ҳеч қандай таниши йўқлигини, ишга кирувчини ишонтириш мақсадида у билан бошқа рақам орқали, овозини ўзгартирган ҳолда гаплашганини айтган. Ҳозирда ҳолат юзасидан бир нечта моддалар билан жиноий иш қўзғатилган. Терговга қадар суриштирув ишлари олиб борилмоқда.
