Шу йил 7 декабрь куни Сирдарё вилоятида фуқаро Х. ҳуқуқ тартибот органларига мурожаат қилган. Бу ҳақда бош прокуратура хабар қилди.
Фуқаро ўз аризасида унинг таниши Ж.З. (1994 й.т.) бизнесдаги рақиби М.Д.ни ўлдириш бўйича унга мурожаат қилганини айтган. Унинг таниши рақибини ўлдириш учун 5000 доллар тўлашга тайёр бўлган. Шунингдек, Ж.З. агар Х. ушбу таклифга кўнмаган тақдирда ҳам бошқа одамни топишини айтган. Тадбиркор аванс сифатида 1000 доллар тўлаган.
10 декабрда ариза ўрганиб чиқилгач, ҳуқуқ тартибот органлари Ж.З.ни ушлаш бўйича махсус тезкор тадбир ташкил этган. Тадбир давомида М.Д.ни гўёки ўлгандек кўрсатиш учун соҳта сурат яратилган. Суратни кўргач Ж.З. қолган 4000 долларни ҳам тўлаган. У пулни бераётган вақтда эса ушланган. Ҳозирда ҳолат бўйича жиноий иш қўзғатилган.
