Тошкентда эркак ва аёл ЙПХ ходимлари билан жанжаллашган видео тарқалди. Видео телеграм каналларда эълон қилинди.
Видеодаги эркак собиқ депутат Қобил Дўсов экани айтилмоқда. Шунингдек, видеода жанжаллашган аёл эса ўзини амалдаги депутат эканини айтганини эшитиш мумкин. Маълум бўлишича, видеодаги ҳолат бўйича пойтахт ИИББ маълумот берган. Унда айтилишича, шу йил 26 январь куни “Каптива”ни бошқариб кетаётган ҳайдовчи соат 23.30 да Яшнобод туманидаги Мирзо-Улуғбек ва Султонали Машхадий кўчалари кесишмасида инспекторнинг тўхташ ҳақидаги ишорасига бўйсунмай, ҳаракатни давом эттирган. Кейинчалик у Мирзо-Улуғбек ва Маҳтумқули кўчалари кесишмасида тўхтатилган. Автомобилни 36 ёшли Қобил Дўсов (собиқ депутат – таҳр.) бошқараётгани маълум бўлган. Дўсов таҳлил натижаларига кўра маст ҳолатда экани ва ҳайдовчилик гувоҳномаси ҳам йўқлиги аниқланган. Шунингдек, автомобилда Дўсов билан бирга кетаётган (видеода ўзини депутат деб таништирган аёл – таҳр.) 42 ёшли Феруза Б.га тегишли экани маълум бўлган.
ИИББнинг маълум қилишича, Дўсовга МЖтКнинг 131 моддаси биринчи қисми (“Транспорт воситаларини маст ҳолда бошқариш”) бўйича маъмурий баённома расмийлаштирилган. Феруза Б.га нисбатан эса МЖтКнинг 131 моддаси учинчи қисми (“Алкоголли ичимликдан, гиёванд модда таъсиридан ёки ўзгача тарзда маст шахсга транспорт воситасини бошқаришни топшириш”) бўйича маъмурий баённома расмийлаштирилган.
