Тошкент вилояти Зангиота туманида эркак пичоқлаб ўлдирилди. Бу ҳақда туман суди судьяси Зафар Шаропов хабар қилди.
Маълум бўлишича, аввал 5 марта судланган, умрининг 10 йилини қамоқда ўтказган Б. яна жиноят содир этган. У кунларнинг бирида уйига дўсти Ваҳобни чақиради ва у билан ароқ ичади. Шундан сўнг улар маишатни давом эттириш мақсадида уйга яна 3 нафар танишини ҳам чақиради. Маишат зўр давом этаётганда меҳмонларнинг 2 нафари кетиб қолади. Шунда уйда қолган меҳмонлардан бири ўша ерда хизмат қилиб юрган, Б.нинг хотинидан исмини сўрайди. Ушбу ҳолатни аёл эри Б.га айтиб беради ва жаҳли чиққан Б. пичоқ билан ўша меҳмоннинг кўксига санчийди. Меҳмон ўша ернинг ўзида вафот этади. Б. бу орада Ваҳобни ҳам жароҳатлаб, меҳмонни “мен ўлдирганман” деб айтишни буюради. Ваҳоб эса жон қайғусида унинг шартини қабул қилади.
Судья Шароповнинг сўзларига кўра ҳодиса юзасидан бўлиб ўтган судда Б.нинг барча айби исботланган ва унга қонуний жазо тайинланган. Шароповнинг қўшимча қилишича, хавфли рецидивист Б. қотилликни содир этаётган вақтда озодликни чеклаш жазосини ўтаётган бўлган.