Тошкент шаҳри Бектемир туманида жойлашган “Techno Continental” МЧЖда бахтсиз ҳодиса юз берди. Бу ҳақда ИИВ Тергов департаменти хабар қилди.
Маълум бўлишича, 1 февраль куни металл кесиш учун мўлжалланган дастгоҳда 23 ёшли ишчининг бармоқлари кесилиб кетган. Кейинчалик фуқаро “оғир” тан жароҳатлари олганлиги маълум бўлди.
Ушбу ҳодисадан сўнг корхона мансабдорларига нисбатан ЖКнинг 257-моддаси 1-қисми (Меҳнатни муҳофаза қилиш қоидаларини бузиш) билан жиноят иши қўзғатилган. Ҳозирда тергов давом этмоқда.