Самарқандда уч нафар эркак босқинчилик жиноятин содир этди. Бу ҳақда ИИВ Тергов департаменти хабар қилди.
Маълум бўлишича, шу йил 22 февраль куни соат 13:30ларда Самарқанд шаҳри Илғор МФЙ.да яшовчи 51 ёшли Муборак Д.нинг уйига уч нафар эркак эшикнинг очиқлигидан фойдаланиб кириб олган. Улар бошларига кепка, юзларига ниқоб тақиб, хонадон эгасини уриб хушидан кетказган. Уй хизматчисининг қўлларини эса боғлаб қўйган. Шундан сўнг босқинчилар сейфдаги 42.500 доллар, 2.400 долларлик тақинчоқлар, 2.100 долларлик айфон ва учта планшетни олиб қочган.
Олиб борилган тезкор тадбир давомида ушбу жиноятни 31 ёшли Асқар И., 32 ёшли Давлат Р., ва 36 ёшли Жасур И., лар содир этгани маълум бўлган. Улар ушланган ва ёнларидан 8.100 доллар топилган. Ҳолат юзасидан ЖКнинг 164-моддаси 4-қисми “а” банди (Босқинчилик) билан жиноят иши қўзғатилган. Ҳозирда тергов ҳаракатлари давом этмоқда.
