Бухорода бундан 32 йил олдин содир этилган қотиллик фош этилди. Бу ҳақда вилоят прокуратураси хабар қилди.
Маълум бўлишича, 1962 йилда туғилган эркак 26 ёшида онаси тенги аёлга жинсий алоқа таклиф қилган. Аёл буни рад этган ва бунинг эвазига эркакдан пичоқ зарбини қабул қилиб, вафот этган. Эркак ўлдириш билан бирга, аёлнинг тилла тақинчоқларини ҳам ўғирлаб кетган. Қотиллик содир бўлган жойда эса эркакнинг бармоқ излари қолиб кетган.
Прокуратуранинг маълум қилишича, 2020 йилнинг сентябрь ойида ўша жиноят ўрганиб чиқилган ва бармоқ излари 1962 йилда туғилган М.Б.га тегишли экани маълум бўлган. Бухоро шаҳар прокуратураси ўша жиноят иши бўйича терговни қайта тиклаган.
Шу йил 15 февралда иш судда кўриб чиқилган ва жавобгарликка тортиш муддати 25 йилдан ўтиб кетганлиги сабабли эркак жазодан озод қилинган.
Қўшимча қилинишича, эркак 1993 йилда эски таҳрирдаги ЖКнинг 15—81-моддаси (қасддан оғир тан жароҳати етказиш), 1996 йилда ЖКнинг 169-моддаси 2-қисми (ўғрилик), 2005 йилда 169-модданинг 1-қисми (ўғрилик) билан айбланган бўлган.