Самарқанд вилоятида тадбиркор қўшнисини ўлдирмоқчи бўлди. Бу ҳақда СТВ хабар қилди.
Маълум бўлишича, тадбиркор қўшниси билан 2017 йилда жанжаллашган бўлган. Шундан сўнг уларнинг можароси юзасидан суд бўлиб ўтган ва унинг қарорига кўра томонларнинг бирига нисбатан жиноий иш қўзғатилган бўлган. Шу вақт оралиғида тадбиркор қўшнисидан алами сўнмаган ва ундан қутилиш режасини тузиб чиққан. Шу сабабга кўра тадбиркор “киллер” ёлламоқчи бўлган. У эса вазифани бажармай, ҳуқуқ тартибот органларига мурожаат қилган.
Саҳналаштирилган қотилликдан сўнг тадбиркор ёлланган шахсга пулни бераётганда қўлга олинган. Ҳолат юзасидан бўлиб ўтган судда тадбиркор 5 йилга озодликдан маҳрум қилинган.