Сурхондарё вилояти Денов туманида 4 март куни 28 ёшли Абдулло Р. 20 ёшли Суғдиёна Х.ни олиб қочмоқчи бўлган. Бу ҳақда ИИВ Тергов департаменти хабар қилди.
Маълум бўлишича, ҳодиса Ўрикзор МФЙ ҳудудида соат 10:30ларда содир бўлган. Ўша куни икки киши Суғдиёнани мажбурлаб Спарк автомобилига ўтирғизган. Машина ичида эса Абдулло бўлган. Спарк сал юргач машинадан Суғдиёнини мажбурлаб ўтирғизганлар тушиб қолган. Шундан сўнг Абдулло қизга менга турмушга чиқсанг уйинга олиб бораман деб шарт қўйган. Суғдиёна ўзини ушбу шартга кўнгандек кўрсатиб, Абдуллодан қутилиш учун унга ёлғон ваъда бериб, машинадан тушишга эришган. Шундан сўнг қиз ҳуқуқ тартибот органларига мурожаат қилган.
Ҳолат юзасидан ЖКнинг 136-моддаси (Аёлни эрга тегишга мажбур қилиш ёки унинг эрга тегишига тўсқинлик қилиш) билан жиноят иши қўзғатилган. Шунингдек, Абдуллонинг иккита шериги 25 ёшли Зухриддин С., ҳамда 18 ёшли Аслиддин Э. экани ҳам маълум бўлган.
Абдулло қиз бошқа бировга тегиб кетмаслиги учун шу ишга қўл урганини айтган. Департаментнинг қўшимча қилишича, юқорида келтирилган моддадаги жиноятни содир этганлар БҲМнинг 25 бараваригача жарима ёки 360 соатгача мажбурий жамоат ишлари, 3 йилгача ахлоқ тузатиш ишлари ёхуд 1 йилдан 3 йилгача озодликни чеклаш ёки 3 йилгача озодликдан маҳрум қилиш билан жазоланиши мумкин.
