2019 йилнинг 30 январь куни Наманган шаҳар ИИО ФМБ 4-сон ИИБ Тергов бўлинмаси катта терговчиси Отабек Жалолов вилоят ИИБ бошлиғи номига билдирги билан мурожаат қилди. Бу ҳақда «Дарё» маълум қилди.
Унда иш юритувида бўлган шахсга нисбатан қўзғатилган жиноят иши бўйича тергов ҳаракатлари олиб бориш давомида мазкур жиноятни содир этишда иштироки аниқланган А.Ж.ни кўрсатма олиш учун чақиртирган вақтда ўзини унинг яқин танишиман деб таништирган «Зокир» исмли шахс у билан бирга хизмат хонасига келиб, жиноят ишининг А.Ж. оид қисмини тугатиб бериш эвазига 500 АҚШ доллари беришни таклиф қилганлигини билдирилган.
О.Жалоловнинг билдиргисига асосан шу куннинг ўзида вилоят прокуратураси, ИИВ ЎХБ Наманган вилояти бўйича бўлими, тергов, ЭКБ ва кадрлар бошқармаси ходимлари ҳамкорлигида тезкор тадбир ўтказилди. «Зокир» исмли шахс Жалоловнинг хизмат хонасида 450 АҚШ долларини пора тариқасида берган пайтда ашёвий далиллар билан ушланган.
Терговга қадар текширув давомида ушбу шахс Наманган шаҳридаги «Тинчлик» маҳалласида яшовчи З.Р. эканлиги аниқланди. У томонидан пора тариқасида берилган 450 доллар холислар иштирокида текшириб кўриш учун олинган.
Ҳозирда мазкур ҳолат юзасидан Наманган шаҳар прокуратураси томонидан ЖКнинг 211-моддаси 1-қисми билан жиноят иши қўзғатилиб, тергов ҳаракатлари олиб борилмоқда.
