Самарқанд вилоятида ваҳший қотиллик содир этилди. Бу ҳақда Самарқанд вилоят прокуратураси хабар қилди.
Маълум бўлишича, шу йил 14 март куни Пайариқ тумани Алишер Навоий маҳалласида яшовчи аёл М.Т. 7 ва 14 ёшли болалари йўқолгани ҳақида ҳуқуқ тартибот органларига мурожаат қилган. Болалар мактабга кетамиз деб уйдан чиқиб, қайтиб келмаган. Кейинчлик аниқланишича, 6-мактабда 1- ва 7-синфда ўқувчи ака-укалар 27 ёшли аёл томонидан ўлдирилган бўлган.
Прокуратурага кўра, жиноят 13 март куни содир бўлган. Аёл О.Т. таниши М.Т.нинг уйига яширин равишда кириб, ўғрилик жиноятини содир этаётганда ушбу ҳодисани ака-укалар кўриб қолган. Шунда аёл гувоҳлардан қутилиш мақсадида уларни ўз уйига алдаб олиб келган. Уйга келгач аёл дастлаб А.Т.ни белукрак билан уриб, ўлдирган. Шундан сўнг аёл укасига ёрдам бериш учун келган акасини ҳам белкурак билан ўлдирган. Аёл жиноят изини яшириш мақсадида мурдаларни ёқиб юбориб, уларни кўмиб ташлаган. Олиб борилган тадбир давомида исковчи итлар мурдаларни аниқлаган.
Ушбу ҳолат юзасидан ЖКнинг 97-моддаси 2-қисми «а», «в», «ж», «о» бандлари (қасддан одам ўлдириш) билан жиноят иши қўзғатилган. Аёл ҳибсга олинган. Иш юзасидан тергов ҳаракатлари олиб борилмоқда.
