Тошкент вилояти Чирчиқ шаҳрида Ўзбекистон Президенти Шавкат Мирзиёев номидан сохта аккаунт очган фуқаро қўлга олинди. Бу ҳақда ҳуқуқ тартибот органлари хабар қилди.
Маълум бўлишича, Чирчиқда яшовчи 38 ёшли М.М. фейсбукда давлат раҳбари номидан аккаунт очган. Сўнг у орқали мулоқотга киришиб, инсонларга ўзини Ўзбекистон Республикаси Президенти Администрацияси раҳбари сифатида таништирган. У мурожаатчиларнинг муаммоларини ҳал қилиб бериш учун 50 минг сўмдан 1,5 млн. сўмгача пул олган. Пулларни пластик картасига ташлатиб олаверган. Шу йил 5 февраль куни ўтказилган тадбирда фуқаро қўлга олинган. Унинг телефони ашёвий далил сифатида олинган.
Фуқарога нисбатан ЖКнинг 168-моддаси 1-қисми билан жиноят иши қўзғатилган. Дастлабки тергов ҳаракатлари олиб борилмоқда.
