Кеча ижтимоий тармоқларда қари аёлнинг калтаклангани юзасидан видеохабарлар тарқалди. Унда аёл қизи ва невараси томонидан калтаклангани хабар қилинган эди.
Маълум бўлишича, шу йил 26 апрель куни 1934 йилда туғилган Г.Тоза шифохонага невараси 1983 йилда туғилган Г.Даврон томонидан олиб келинган. Шундан сўнг шифокорлар ушбу ҳолат юзасидан ҳуқуқ тартибот органларига мурожаат қилган. Кейинчалик жабрланувчининг сўзларига кўра аёлни 1964 йилда туғилган қизи Г.Саодат ва 1989 йилда туғилган невараси Г.Севара мунтазам уриб келгани аниқ бўлган.
Тошкент шаҳар ИИББнинг хабар қилишича, ҳолат юзасидан ЖКнинг 110-моддаси 2-қисми “в” банди, яъни ожиз аҳволдалиги айбдорга аён бўлган шахсни қийнаш аломатлари билан жиноят иши қўзғатилган. Шунингдек, тиббий экспертиза ҳам тайинланган. Унинг натижасига кўра айбдорларга чора кўрилиши маълум қилинди.
