Жиззах вилоятидаги трассада юк автомашинасининг тормози ишламай қолди. ЙТҲда 8 киши жабрланди, дея хабар қилди EVERYDAY.UZ мухбири.
Маълум бўлишича, ҳодиса шу йил 17 май куни Тошкент-Термиз йўлида содир бўлган. Йўлда ҳаракатланиб кетаётган Howo юк автомашинасининг бирданига тормози ишламай қолган. Шунинг натижасида у олдида кетаётган 4 та енгил автомашинага зарар етказган.
Воқеа содир бўлган туманда хизмат вазифасини олиб бораётган ЙПХ ходими эса вазиятга бирданига баҳо бера олган. У хизмат автомашинасида Howo’ни қувиб ўтиб, “мигалка”сини ёққан ҳолда бошқа ҳайдовчилардан машиналарни четга олишни сўраган.
Маълум вақт ўтгач юк автомашинасини тўхтатишга эришилган.
Ҳодиса оқибатида Қашқадарё, Самарқанд ва Жиззах вилоятилик 8 нафар фуқаро жабрланган. Уларнинг ҳаммаси Республика шошилинч тиббий ёрдам илмий маркази Жиззах филиалига олиб борилган.
