Аввалроқ Андижон вилоятида 5 ойлик келинчак зўрлангани ва ушбу ишни содир этганликда 6 киши гумонланаётгани ҳақида ёзган эдик.
Ушбу хабар тарқалгач қатор блогер ҳамда тармоқ фойдаланувчилари томонидан турли хил хабарлар тарқатилди. Мазкур ҳолат кузатилгандан сўнг Андижон вилоят прокуратураси иш юзасидан расмий баёнот берди.
Унда ҳодиса юзасидан ЖКнинг 118-моддаси 1-қисми (номусга тегиш) билан жиноят иши қўзғатилиб, тергов ҳаракатларини ҳар томонлама тўла ва холисона ўтказилишини таъминлаш мақсадида, Андижон вилояти ИИБ ҳузуридаги Тергов бошқармасининг малакали терговчиси иш юритувига ўтказилгани ва тергов гуруҳи тузилганлиги маълум қилинган.
Ҳолатга алоқадор бўлган барча ашёлар олингани, воқеа жойи бориб ўрганилиб, видеотарсвирга олингани таъкидланган. Керакли экспертизалар тайинлангани, ишга алоқадор барча гувоҳлар сўроқ қилингани ҳамда гумонланувчилар тезкорлик билан аниқлангани қўшимча қилинган.
Вилоят прокуратураси иш юзасидан қатъий назорат ўрнатган ва айбдорларга жазо муқаррарлигини алоҳида таъкидлаб ўтган. Шу билан бирга, прокуратура аҳоли орасида асоссиз ва ваҳима келтириб чиқарувчи хабарларни тарқатмасликни сўраб қолган.