Аввалроқ Андижон вилоятида жойнамоз устида ўтирган аёлни келини кетмон билан уриб ўлдиргани ҳақида хабарлар тарқалган эди. Бош прокуратура ўша ҳодиса юзасидан жиноий иш қўзғатилганини маълум қилган эди. Дарё нашрининг ёзишича, Бош прокуратура воқеа юзасидан батафсилроқ маълумот берган.
Келтирилган маълумотда аёлни келин эмас, балки унинг собиқ келинининг эри ўлдиргани айтилган. Ҳодиса шу йил 14 апрель куни соат 17:42 ларда Олтинкўл тумани «Марказ» маҳалласида содир бўлган. Эркак бирга яшаб келаётган 79 ёшли аёл билан хонадонни девор орқали бўлиш масаласида тортишиб қолган ва натижада қўлидаги кетмон билан унинг бошига уриб ўлдирган.
Маълум қилинишича, воқеа содир бўлгач ҳодиса жойи ҳуқуқ тартибот органлари томонидан ўрганилган ва у ердан керакли ашёвий далиллар олинган. Аёлни ўлдиришда гумон қилинаётган эркакдан ўша куннинг ўзида таҳлил олинган ва натижалда унинг қонида 1,5 фоиз этил спирти борлиги аниқланган. 15 апрель куни эркакка нисбатан ЖКнинг 104-моддаси (қасддан баданга оғир шикаст етказиш) 3-қисми «д» банди билан айб эълон қилинган ва у ҳибсга олинган. Эркак ўз кўрсатмасида кетмонни аёл олиб чиққанини, «вой-дод мени уряпти» деб бақиргани сабабли барибир туҳматда қоламан дея ўйлаб, қўлидаги кетмон билан аёлнинг бошига бир маротаба урганини билдирган. Лекин бошқа гувоҳлар эркак дастлаб кетмон билан усталарни қувлагани сўнгра аёлни кўриб қолиб, унинг бошига урганини айтган. Ҳозирда тергов ҳаракатлари давом этмоқда.
