Ижтимоий тармоқларда қайни укаси томонидан 16 марта пичоқланган келин воқеаси кенг муҳокама бўлган эди. Шундан сўнг Жиноят ишлари бўйича Тошкент шаҳар суди биносида ҳомиладор келинойисини пичоқлаган 21 ёшли йигитнинг иши юзасидан суд бўлиб ўтди.
Суд жараёнида бола ўз айбига иқрор бўлиб, барчадан кечирим сўради.
– Акам уйланишидан олдин уйимизда тинчлик бор эди. Меҳр-оқибат бўлар эди. Отани ота ўрнида, онани она ўрнида кўрар эдик. Акам уйланди, ҳаммаси бошланди, – деди айбланувчи. – Мен ҳозир шу кунгача хулосам, ака шу сизнинг хотинингиз, сизга агар уни қилиқлари ёқса,сизга билинмаса менга билинади. Барибир (келин) шу вақтгача ота-онамнинг ҳурматини жойига қўймаган. Акамга тушинтирсам бўлар эди. Шунда ҳозир вазият бошқача бўлган бўлар эди. Афсус мен бу нарсани кейин тушиндим. Тўғриси қилган ишимдан пушаймонман.
Оиладаги бундай вазиятлар айбланувчининг отасини чорасиз қолдирди. Суд залида ота вазиятга нисбатан ўз муносабатини билдирди.
Аллоҳга беҳисоб шукр келинимиз оёққа туриб олди. Мен шундан хурсандман. Унинг ва набирамнинг тирик қолганидан хурсандман. Ҳукм чиқараётганлар менга бир имконият берсангиз. Шу боламни мен яна қайтадан тарбиялай. Жамиятимизга фойдаси тегадиган бола қилиб чиқарай, - деди судланувчининг отаси.
Шундан сўнг суд ҳукми ўқилди ва болага нисбатан Жиноят Кодексининг бир қатор моддалари билан 15 йил муддатга озодликдан маҳрум этиш жазоси тайинланди.
