Тошкент вилояти Янгийўл шаҳрида жойлашган МИБ биносида аёл пичоқланди. Бу ҳақда EVERYDAY.UZ мухбири хабар қилди.
Маълум бўлишича, шаҳарда яшовчи эркакка шу йил бошида уч нафар фарзанди учун алимент тўлаши кераклиги тушинтирилган ва бу бўйича суд қарори ҳам эълон қилинган. Ушбу ишнинг ижроси МИБ зиммасига юклатилган. Маълум қилинишича, шундай бўлишига қарамай эркак алиментни тўлашдан бош тортган ва шу йил сентябрь ҳолатига эркакнинг алиментдан қарзи 1 миллион 864 минг сўмни ташкил этган.
Шу сабабга кўра МИБ вакили эркакка қарз тўламагани учун иш юзасидан МЖтКнинг 47-4-моддасига (вояга етмаган ёки меҳнатга лаёқатсиз шахсларни моддий таъминлашдан бўйин товлаш) асосан маъмурий жавобгарлик масаласини кўриб чиқиш учун судга тақдим этиши ҳақида маълум қилган.
Ушбу ҳолатдан кейин эркак ва унинг собиқ хотини 10 сентябрда МИБ биносига келган. Шу вазиятда эркак кутилмаганда ўзи билан олиб келган пичоқ билан собиқ хотинининг қўл ва елка қисмларига бир неча тан жароҳати етказган. Эркак ички ишлар ходимлари томонидан олиб кетилган. Аёл эса шифхонага оли борилган.
Ҳолат юзасидан ЖКнинг 25-97-моддаси 1-қисми (қасддан одам ўлдиришга суиқасд қилиш) билан жиноят иши қўзғатилган ва тергов олди текширув ҳаракатлари олиб борилмоқда.
